dimanche 15 mars 2009

تنتهي حريّتك عندما تبدأ حريّة غيرك

الملاحظ في الشأن العام في الايّامات اللّي فاتو، يشوف الزّوبعة في الفنجان اللّي اقامتها قلّة قليلة من الشّعب التّونسي(115 امضاو على العريضة ضدّ زيارة القرضاوي وعالاكثر 2000 والاّ 3000 يندّدوا ويشجبوا من 12 مليون تونسي) تعرّف روحها وتسمّي روحها "النّخبة" المثقفة (شكّار روحو توّا تعدّى!! النخبوية والثقافة ولاّت تقاس بدرجة الالحاد والاّ اللاّئيكية والا موش عارف شنوة!) لكن ماعليناش!

ياخي بربّي قولولي موش النّهار ووطولو نكرّطوا ونعاودوا في نفس المعبوكة وجمعة جمعتين تقوم القيامة؟ الحريّات... علاش ما نحترموش آراء بعضنا بكلّ بساطة؟!

الاسلام في تونس موجود وباش يقعد انشاء الله موجود من غير لا تطرّف ولا غلوّ!! واللّي يحبّ يلحد والاّ يعبد بوذا اموروا الخاصة اما بجاه ربي يحترم غيروا موش لازم يدخلها بفركة وعود حطب ويولّي يحب يفرض رأيو
و يستفزّ قال شنوة لخرين رجعيين وماهم فاهمين شيء وهو عالم علاّمة مستنير و...و...و... (وطبيعي وقتها باش يردّوا عليه بالمثل وتِلْحِمْ)

ومشكلتنا في البلاد انّو بالنّسبة لكلّ واحد، الحرية تعني حريتوا هو برك مايهموش في الناس الاخرين اللّي معاه!! وهنا يمكن الموضوع هذا يحيلنا على الدّيمقراطية... اللي ماناش مستانسين بيها ونحكيو عليها شكليّا... يضهرلي عندنا مشكل كبير متاع قبول الرّأي المخالف استانسنا يكون فمّا صوت واحد ورأي واحد وحزب واحد ونوع واحد و...و...و...

تونس مساحتها: 163 الف كلم وناسها 12 مليون يعني فمّا بلاصة للنّاس الكلّ و يضهرلي كلمة السرّ هي:

من ناحية: الاختلاف لا يفسد لنا في الودّ قضية
ومن ناحية اخرى: تنتهي حريّتك عندما تبدأ حريّة غيرك

وكاني غالط فيقوني على روحي وقولولي
ايّا انّستوا و
Bon Dimanche :))

4 commentaires:

  1. عجوزوشد سارق
    بحكم فارغيين ومعندهم مايقولو اهوكة شوية ضجيج وحس
    الي يحز في نفسي(هه عجبتني)انو بعد حوالي 7 اشهر عندنا موعد تاريخي وحدث هام لمستقبل تونس وهومة لا حياة لمن تنادي قالو قرضاوي جاء ولا للزيارة
    ناس تحضر انتخاباتها وتقدم برامجها وتعلن على اصلاحتها وهوما قالك تونس لايئكية
    كان جات الدنيا دنيا راو حتى احزاب المعارضة نشطو شوية واعطونا بديل ،لا هوما توة لاهين في فلان سرق وفلان جاب البورش لتونس اي فيبالي بيه والناس الكل تعرف ،يزيني من البكاء وقلي كان تشد لبلاصة اش تعمل انت؟ شنوة برنامجك لاصلاح التعليم والقضاء على البطالة وووو؟
    المضحكي انو يقلك حزب اسلامي معندهمش برنامج
    سمعت بالبنك المركزي الاروبي باش ينحي الفائض متع الفائدة؟ باش يعطي قروض للبنوك بلاش فائض ،اخدم ورجعلي من بعد؟
    في امريكيا وفي بريطانيا ترتفع اصوات باش يستعملو القانون الاسلامي متع تحريم الربا
    علاش الانسان يعاند وتاخذو العزة بالاثم ومزال يحب يجرب ؟؟ اشتراكية فشلت، راسمالية فشلت وغيرهم كثير
    بون هزني لحديث على فكرة هايل لوغو لا للاسلاموفوبية

    RépondreSupprimer
  2. على من تقرأ "زابورك" يا داوو... "البوسط" يطالب بسياسة الإستماع للأخر وعنو الحق في هذا حتى وإن لم أكن من القائلين برأيه أننا "فارغين شغل" والأخر يعاود في نفس البعكوكة إللي في كل مندبة يجيبها، حقوا يبدل الاسطوانة شوية...

    RépondreSupprimer
  3. يا خ.خ
    قدر سنك ومستواك ومتخلنيش نطيح في قدرك
    اشبيك عابدني ياسيد
    مرة هاك عاملي درس صرف ونحو ؛مرة هاك موش عاجبك حديثي
    فيق على نفسك وانزعني يهديك
    على فكرة احسنت كيف عملت بالراي ونحيت عليك هاك ذيل لحصان الي كنت عاملها موش حلوة الحق
    لا داعي للرجوع للرد علي لانني لن اجيبك
    فاحترم نفسك شوية
    مع الشكر

    RépondreSupprimer
  4. "والأخر يعاود في نفس البعكوكة إللي في كل مندبة يجيبها، حقوا يبدل الاسطوانة شوية"


    يعطيك الصحّة استاز خَمِيسْ الخياطي!!! دَا أَنْتَ زْهِرْطْ عِنْدَك اخلاق ريازية اوِي!!! ودَا درس من عند حضرتك في احترام الآخر يا بْتُوع "النخبة" انت

    امّال ايه؟ عاوز عمروش يِقِبْلَك السِّت ام كلسوم في مكان الاسطوانة اللي اسمالله عليك زهأتك اوي؟!

    ملاحزة: انا اكتبلك بالمصري لاني عارف انّك بتحّبها أوي!!! يعني بتحبّ تتكلّم بيها اوي في التلفزيون مع انّك تونسي وتعتبر نفسك من "النّّخبة" التونسية يعني لا مؤاخزة مِش المصرية

    RépondreSupprimer