اطلقوا سراح فاطمة

اذا الشعب يوما أراد الحياة
فلا بد أن يستجيب القدر
ولا بد لليل أن ينجلي
ولابد للقيد أن ينكسر


http://freearabicca.wordpress.com/

ان لم تستحي فافعل ما شئت

شوفوا قلة التربية والمستوى المنحطّ للذين يحسبون انفسهم على الصحافة وهي منهم براء!! الشيء من مأتاه لا يستغرب يامرتزقة البنفسج انتم يا اعداء الوطن بحقّ!! اهذا ما تعلمتموه في كليات الصحافة؟؟! اهذه اخلاقيات المهنة؟ اهذه وطنيّتكم؟؟

المصدر: من صحيفة كل الناس 24 اكتوبر 2009 وموقع الفايسبوك (صور الاخ المدون كلاندستينو) ا

عدنا والعود احمد

ويني الجزيرة نت؟؟؟
اولى ضحايا ال404 باشي بعد اليوم الكبير!!!! هذي هي تونس حرية الاعلام، تونس الرأي والرّأي الآخر

حرصا على الشفافية

عندي برشة ما كتبت شيء وبعيد على المدونة لكن العوج اللي شفتوا البارح ما انّجمش نسكت عليه.

المهمّ، البارح مشيت ننتخب...الحاصيلو في لعشية امّخر (في الوقت اللي يوليو يستبعدو انو يجيو فيه ناس) وكان معايا انسان نعرفوا لكنّوا سبقني للقاعة اللي باش ننتخبو فيها. واحنا داخلين للمركز الانتخابي لفتت انتباهنا الحفاوة والترحاب متاع "عمدة" المنطقة وخاصة انّوا ضهر مربوث ودخل بعضوا كي شافنا وتو تعرفو علاش (هو اللي في العادة عمروا ما يسلم علينا...).

كيما قلت سبقني مرافقي للقاعة متاع الانتخاب وكيف دخلت انا نلقا الدنيا داخلة بعضها والجماعة يتغامزو عليه ويتلفوا في الجرّة (ما فاقوش اللي احنا مع بعضنا). اكهو فهمت آش صار: ضهر السيّد مازال في دارو وهوما ريڨلولو اموروا وانتخبوا في بلاصتوا وصححوا في الدفتر في بلاصتوا... آيا قالولو ما صار شيء برّا للخلوة اختار وموش لازم تصحح (الورقة كلها مصححة وماعادش فمة بلايص)... هاذا كلّو صاير وانا واقف نتفرّج!! السيّد مشى للخلوة وانا نسمع فيهم يْوَشْوْشُو ويحكيو بالسرقة بالحرف الواحد:

"هذا العمدة انتخب في بلاصتوا...!!!!"

زعمة العمدة عندوا توكيل على العباد اللي ما جاوش؟؟ بانا حقّ؟؟ زعمة انتخب احمد ابراهيم والاّ الاينوبلي؟؟؟

نفس الحالة صارت مع انسان نعرفوا في ولاية اخرى وهذا ان دلّ على شيء فيدلّ على انّوا شيء منظم (انتخبوا في بلاصة اكثر اللي ما جاوش وخلو شوية غائبين تمويه....) زعمة الهيمنة على كلّ شيء في البلاد ما يكفيوش؟؟؟!!!!

حاجة اخرى، الجوابات اللي لازم تحط فيهم ورقة الانتخابات الرئاسية لونهم ابيض بحيث يورّيو شنوة لون الورقة اللي حطيتها (جرّبتها الفازة)... نعرف هذا الكلّو حرصا على "الشفافية" في كلّ شيء

ايّا امالا دمتم على شفافية وانشاء الله بعد 5 والا 10 سنين تولي فمة ديمقراطية فعلية حتى وان كانت نسبية

يا مزين مالبرّة، آش حالك من داخل

في مقام ثقافة المظاهر واليسار الفيّاس

لحية مسيّبة، "بربيش" كيف المعزة، بعبوص كيف الحصان، كشكول مل الفريب، مريول "تشي ڨيفارا" مالحفصية، والاّ شويّة كاكويّة و حويرة دخّان كريستال وشوية ريحة ميزيريا...

هذي من رموز "النّخب الحرفوشية" آه حبّيت نقول "المثقفة"(والثقافة منهم براء) واليسارية (توّى جدّ عليكم عندنا يسار في تونس؟؟؟!! غير كعيبتن عايشين على الاطلال و"ليت الشباب يعود يوما"!!)

امّالا فهمتها كيفاش؟ باش تظهر مثقف و خاصة يساري ملتزم وفاهملها لازمك تحفضلها شوية شعر ثوري والاهمّ مل الكلّ تتلها باللّوك ههههههه (هذا راس المال متاع رؤوس الفكارن)...

والله يحبّس علينا العقلّ والدّين هاذاكا الواحد آش يقول!!

وماهي الحقيقة مرّة والواقع امرّ منها، هاو كلّ شيء بالمكشوف في جريدة
(ويا مزين مالبرّة، آش حالك من داخل)Le temps

ايّا انستوا!!

دار المعمّر "سان لوران" للموضى العالمية

بمناسبة الأجواء الرّائقة والمناخ السعيد المفعم بمظاهر الفرح والانشراح ورياح البهجة التي تمسّ القطرين المغاربيين الشقيقين: تونس شهرت "بلاد الفرح الدّائم في ضلّ القيادة الحكيمة والمتبصرة..." والجماهيرية العربية الليبية الشعبية الاشتراكية العظمى شهرت "الجماهيرية العظمى" (ركّزوا على العظمى)

وذلك تباعا بمناسبة الحدث التّاريخي متاع "تَفَضُّلْ" قائد المسيرة المضفّرة وصانع كلّ شيء في بلاد الزيتون بتقديم ترشّحه للمرّة الخامسة لدور البطولة في مسرحية الانتخابات (بالسيف، بالتلحليح...هو ماعينوش مسكين لزّموا عليه)... واحتفال نظيره "المعمّر" شهر "ملك ملوك افريقيا" بالذكرى الاربعين (آش خلّى على المأسوف على شبابه عمر بنڨوا؟؟!!) لتربّعه على ثروات ليبيا...

تتشرّف دار "المعمّر سان لوران" للموضى العالمية والاناقة بدعوتكم لحضور حفل عرض ازياء تاريخي بمشاركة احد اشهر عارضي الازياء في العالم ...(اضغط على الصور لتكبيرها)

ملاحظة: الرّجاء من السّادة الحاضرين الالتزام بالجدية و عدم الضّحك

تمخّظ الجبل فولد عسلا

اوباما في خطابه المنتظر للمسلمين والشّرق الاوسط: عسل وكلام منمّق وعبارات ووعود فضفاضة يعني بلغة اخرى "اكتب على الحوت وسيّب في البحر"... والصّحيح يجيبوا ربّي!
الحاجة الوحيدة اللّي يمكن التّأكيد عليها هي انّ السيّاسة الخارجية الامريكية تجاه المنطقة تشهد تحوّلا كبيرا من "الهارد باور" متاع الصّقور والجمهوريون الى "السّوفت باور" متاع الديقراطيين والماركتينڨ متاع اوباما والنّتيجة عموما لا تختلف كثيرا

حوار مع صديقي الملحد

لان الله غيب ..
ولان المستقبل غيب ..
ولان الآخرة غيب ..
ولان من يذهب الى القبر لايعود ..
راجت بضاعة الالحاد ..!!
وسادت الافكار المادية ..
وعبد الناس انفسهم واستسلموا لشهواتهم ...
وانكبوا على الدنيا يتقاتلون على منافعها ..
وظن اكثرهم ان ليس وراء الدنيا شيء وليس بعد الحياة شيء .. !!
وتقاتلت الدول الكبرى على ذهب الارض وخيراتها ..
واصبح للكفر نظريات ..
وللمادة فلسفات ..
وللانكار محاريب وسدنة ..
وللمنكرين كعبة يتعلقون باهدابها ويحجون اليها في حلهم وترحالهم...
كعبة مهيبة يسمونها (( العلم )) ... ا

حوار مع صديقي الملحد هو كتاب للاستاذ مصطفى محمود اعتبره قيّما وانصح الجميع بقراءته...

للحصول على نسخة كاملة مجانا
اضغط هنا

السّخانة وما ادراك ماالسّخانة

السّخانة وما ادراك ماالسّخانة وقيل فمّة واحد ضربتّوا السّخانة او ما يعبّر عنه بالحمّى! قْوَى عليه الضّرب من كلّ حدب وصوب اكهو عاد فقد البوصلة وهاجت عليه الحملة! ما عادش عارف لأيّ جبهة يْقَبِّلْ... حالتو تسخّف كيف الكلب المكلوب... ربّي يُجْبُرْلُوا مسكين

أحن .. الى خبز أمي

أحن .. الى خبز أمي
وقهوة أمي
ولمسة أمي ..
و تكبر في الطفولة
يوماً على صدر أمي
وأعشق عمري لأني
اذا مت
أخجل من دمع أمي !
خذيني ، اذا عدت يوماً
وشاحاً لهديك
وغطي عظامي بعشب
تعمد من طهر كعبك
وشدي وثاقي ..
بخصلة شعر ..
بخيط يلوح في ذيل ثوبك ..
ضعيني ، اذا ما رجعت
وقوداً بتنور نارك
وحبل غسيل على سطح دارك
لأني فقدت الوقوف
بدون صلاة نهارك
هرمت ، فردي مجوم الطفولة
حتى أشارك
صغار العصافير
درب الرجوع ..
لعش انتظارك .. !

وينكم!!!؟؟

نهار احد، وعيد الامّهات، ومصطفى بن جعفر ترشّح "لاستحقاق" 2009 ، واليوم العالمي ضدّ التّدخين....وشيء عدد التّدوينات مايفوتش عدد صوابع اليدين! شنيّة هالصّحراء التّدوينية؟! وينكم ياخي؟؟ الهذا الحدّ طار الكيف والاّ شنية الحكاية؟

اموال الشعب في القصور وابناء الشّعب في الخيام

فلسفة استبلاه النّاس و اللّجوء الى سياسة النّعامة والمقصّ المصدد متاع عمّار المسّخ واسيادو البنفسجيين بانواعهم واطيافهم (خاطر فيهم اشكون يقتل الميّت ويمشي في جنازتو من مُخبرين و وجوه الخيشة...) تنجّم تتفسّر بحاجة واحدة هي البهــــــــــــــــــــــــامة

على كلّ 404، 505 والاّ يجيبوا معمل البيجو الكلّ (نقصد السيارات وموش مجوهرات) راهو القطار فاتكم! سكّرتوا مدونة عمروش الباهي، باش تضربولوا على الطيّارة؟ غدوة يحلّ وحدا اخرى ويقول اللّي يحبّ وهذا حال المدونين الكلّ...!

اما خليني نخوض شوية في دلالات عمليّة الحجب هذي:

ـ اوّلا، حكاية الفيلاّ (الصحفة 10) اللّي مشرية بسوم دوبل حكاية سيڨوروا صحيحة 1000%
ـ ثانيا، الحرص الشّديد هذا على كتمان الموضوع ماهو الاّ دليل واضح على انّو الحكاية فيها واو وفلوس امّسخة...
ـ ثالثا، دليل اخر على انّو حكايات حرية التّعبير في تونس...تنجّموا حاشاكم تستعملوها بعد قضاء حاجتكم البشرية (سامحوني على العبارات الفضّة!)
ـ رابعا، التّقارير اللّي تصنّف في بلاد الفرح الدّائم على رأس الدوّل اللّي تمارس في الحجب على شبكة الانترنات... صحيحة رغم جغجغة البعض
ـ خامسا، ما كذبوش كيف قالو في ڨفصة "اموال الشعب في القصور وابناء الشّعب في الخيام"

وتوه كتضامن مع عمروش باش نعاود ننشر الموضوع اللّي قلّق عمّار 404 واسيادو

هذا موقع الجريدة (الصحفة 10) ا

http://www.westmountindependent.com/WIv2.10.a.pdf

اهداء خاصّ للصحفيين التونسيين في عيدهم بامضاء جماعة الفارينة

ماو يقولو صحافتنا بعيدة كلّ البعد عن الوصاية و حرّة و مستقلّة وتسبح في الشّفافية والرّوح الرّياضية والاخلاقيات المهنية...آيّا سيدي ما نبعدوش لبعيد هاو الدّليل القاطع على ذلك من طرف المدعوّ كمال بن يونس "رئيس لجنة أخلاقيات المهنة" اللّي يعلّم في "اخلاقيات المهنة" و يكرّس في ثقافة الحوار واحترام الزّملاء... على الطّريقة البنفسجية الصّرفة بالطّبيعة...

وبما انّوا خونا سفيان الشورابي كان موجود في الصّفوف الاولى وشاهد على محاولة الاعتداء السّافرة على رئيس النقابة التونسية للصحفيين (المنتخب ديمقراطيا وهذي حاجة نادرة في تونس) ناجي البغوري...ماذا بينا لو كان يشرحلنا خلفيات اللّي صار

ورجاء لجماعة الفارينة اعفونا من مسرحيتكم سيئة الاخراج متاع الاهتمام البنفسجي السّامي بشؤون الصحفيين والحرية التّي يتسم بها عملهم... واحترموا ذكائنا البسيط فالواقع المرير لم يعد يخفى على احد...

خوذ العلم من رؤوس الفكارن

Voilà ce qu'on peut appeler un attentat pur et simple contre la langue de Molière!!! ( regardez jusqu'à la fin et vous ne serez pas déçus)

اسوأ عشرة بلدان للمدونين: اهلا وسهلا و مبروك علينا على الرّيادة

اصدرت لجنة حماية الصحفيين قائمة للدول الأشد قمعاً لمستخدمي الإنترنت واسوأ عشرة بلدان للمدونين وبطبيعة الحال هل يخفى القمر؟! فكانت البلدان العربيّة ومن بينها بلد الفرح الدّائم في الطّليعة...

يقول التقرير:

" تعتمد السلطات في إيران وسوريا والسعودية وتونس ومصر على مزيج يجمع بين الاحتجاز وفرض الأنظمة الرقابية والترهيب، وتعتبر هذه الدول بأنها الأشد استخدماً للقمع ضد مستخدمي الإنترنت في الشرق الأوسط وشمال إفريقيا"

ثمّ يضيف:

"تتطلب الحكومة من مزودي خدمة الإنترنت في تونس إطلاعها دوريا على عناوين بروتوكول الإنترنت وغيرها من المعلومات الدالة على هويات المستخدمين. وتمر حركة معلومات الإنترنت عبر شبكة مركزية تسمح للحكومة بترشيح المحتوى ومراقبة رسائل البريد الإلكتروني. وتوظف الحكومة مجموعة من الأساليب لمضايقة المدونين: فرض المرقابة، وتقييد حركة المدونين، والقيام بعمليات تخريب إلكترونية. وقد أمضى الكاتبان على الإنترنت، سليم بوخذير ومحمد عبو، عقوبة بالسجن بسبب عملهما.

الحدث الأبرز: حذر الرئيس زين العابدين بن علي في كلمة ألقاها في آذار/ مارس الكُتاب من البحث في "أخطاء وانتهاكات" الحكومة قائلا إنه "فعل لا يليق بمجتمعنا، وليس تعبيرا عن الحرية أو الديمقراطية.""


الحاصيلو شِدّْ مِدّْ يَا حْمِدْ اهوكا ديما معوّمة كلّ عام اتعس من خوه و نورمال "اولاد الحومة لا يسكتون، سيردّون!"
للحصول على التقرير كامل (هنا) ا

الزّيادة في الفارينة

الغباء السياسي، ثورة الزيتون نموذجا: تعقيب

تعقيبا على كلام عمروش في تدوينتو الاخيرة:

نتفق معاك في برشة كلام في تدوينتك لكن في الجزء الاخير ما نوافقكش بالكلّ: على خاطر اوّلا هذي ماهيش علوم صحيحة يعني بشوية بروبغندا وياقفولو فيها ميليشيات التجمع و تلقاه رئيس منتخب ب 98% و وقتها روبولوت وبرّه آش باش يفضّها وهاك تشوف اقحموه في الحياة العامّة وبدأ في السياسة خطوة خطوة وانت تعرف الامور كيفاش تصير في تونس... ثانيا، السيد خالطتوا شخصيّا في وقت من الاوقات ونعرف اللّي عندو علاش يتّكى... يعني عندوا في مخّوا و كان يقرى في الجامعة في بلجيكا (يعني موش نيفو باك!!)... وزادة ماجاش من فراغ عائلتوا لاباس عليهم... ثالثا، امريكا والاتّحاد الاوروبي يساندوه بكلّ ثقلهم لو كان تصير الحكاية نهار (على خاطروا من النّوع اللي يخدملهم مصالحهم على قاعدة: يعني لغة دعه يعمل دعه يمرّ والعلاقات التّجارية اوّلا ثمّ انوا يمثل تيار اسلامي يحبوه هوما باش يدوّروها لغة اعتدال انبطاحي...) يعني ثورة الزّيتون تنجّم تنجح و وقتها عاد روبولوت... والستّار ربي

ألعب... وخلّي النّاس تلعب

بعد فكرة ولاّدة ودعوة ديانا ماغازين، هاني باش نلعب ونعبّر على امانيّ وما يخالج وجداني ههههه... ايّا ما نطوّلش عليكم بالكلام وندخل في صلب الموضوع..


خمسة هدايا اتمنى الحصول عليها:


- تنظيم زّواجي من اللّي تو تعرف روحها من غير ما نسمّي (حتّى هوّ وقيت يضهرلي)

- كلاسور فيه الشّهائد العلمية اللي نجري عليهم بالجهد والمعين الله

- ايّ هدية مهما تكون رمزيّة لكنها من القلب

- عِيشَةً هَنِيَّةً ومِيتَةً سَوِيَّةً وغفران ما قدَّمَتْه وما اخّرته يميني

- مكتبة ما تفرغش من الكتب اللّي ديما يتجدّدوا وتكون في ورشة صغيرة في سيدي بوسعيد

(كنت باش نقول تحرير فلسطين اما هذي حاجة ما تتهداش اما تتكسب بالجهدددددددددد...)


خمسة إجراءات أتخذها لو كنت رئيس دولة: (ولو انّي مانحبّش مسؤوليّات كيف ما هكّة)


- العمل بكلّ صدق واخلاص على جعل النّظام ديمقراطي (باتمّ معنى الكلمة) والتّداول السّلمي على السّلطة في ضلّ تكافئ الفرص والشفافية المطلقة والتّنقيص من سلط رئيس الجمهورية مع الفصل التام بين السلط الثلاث وفصل الدولة واجهزتها عن الحزب الحاكم...

- اجراع اصلاح شامل على النظام التّعليمي في البلاد على خاطر كيف ما تعرفوا هذا هو اساس التّقدم (وتعرفوا زادة المستوى المؤسف الذّي وصلّو هل القطاع)

- العمل على تحرير الاعلام و القضاء على الغة الخشبيية والصنصرة... (لكن بالطبيعة في حدود تنتهي حريتك عندما تبدأ حرية غيرك)

- اوديت شامل لكلّ المسؤوليين الكبار في البلاد اللّي مشكوك في ثرائهم السّريع والمفاجئ بعد تولّيهم مهامهم وزادة عائلاتهم (اصهار الرّؤساء زادة...)، نشر التقارير, تجريدهم من كلّ ماهو غير شرعي وترك للشعب حرية الاختيار بين العفو عنهم او محاكمتهم.

- الاهتمام بالشّباب وخاصة من الطبقات المتوسطة والضّعيفة والقضاع على المحسوبية والمعارف في كل شيء ونتلها بالحقّ (موش بالكلام كيف توة) بالاحياء والحوم المزمرة


خمسة أشخاص اتمنى أن أضربهم: (الله غالب برشة ماذبيّا نعطيهم داوْدي, بونيا والا شلبوق (درجات هههههه) مع انّي ضد العنف ونؤمن انّوا ما يحلّش المشاكل بل يزيد يعمّقها)


- بيريز، اولمرت، ليفني، بن اليعازر، دان حالوتز، باراك (موش اوباما اما الدبّ الصهيوني), كلّ واحد صهيوني , الملك متاع السعودية، بوش، حسني مبارك، وليد جنبلاط, سمير جعجع, محمود عباس والقائمة تشمل كلّ اللي من هالنوع

- اللّي يظلم غيروا (ماللي يضرب مرتوا للّي يغتصب مرورا بلّي يلوّث في المجال السّمعي بكلامو المنمق البذيء)

- الطّرابلسية

- برشة صحفيين توانسة يستحقّوا شلابق

- ساركوزي كيف يبدا يفيّش


خمسة أشخاص اتمنى العيش معهم:


- المسيح ورسول الله سيدنا محمّد عليه الصلاة والسلام

- عائلتي والنّاس اللّي نحبّهم وخاصة محبوبتي

- السيد حسن نصرالله

- اصحابي الكلّ

- مهاتما غاندي

خمسة أشياء أفعلها لو علمت أني سأموت غدا:


- نسلّم على العباد اللي نعرفهم الكلّ

- نطلب السّماح من كلّ حد نشكّ والا نظنّ اني غلطت في حقّوا

- نمشي لسوسة والمكنين وبعد نعمل دورة في سيدي بوسعيد (في تراكن العادة) مع صحابي اللي يعرفوا ارواحهم

- نعمل سهرية عائلية مع الناس اللي نحبّهم

- التعبد وقراءة القرآن, نمشي نصلٌّي الصبح في الجامع وياربّي انشاء الله نموت وانا ساجد لربّ العالمين



ايّا توّه انّستوا هاني قلت كلّ شيء, آه اما قبل ما نمشي باش نختار 5 ناس انشاء الله يقبلو ويشاركوا في اللّعبة: خميّس باندي شهر ولد الفكرونة، مهدي اللجمي، سفيان والاّ لينا (والاّ الاثنين )، طارق الكحلاوي، نضال ضد الطابور الخامس و كل المتآمرين على مستقبلنا... وزادة كلّ حدّ يحب يشارك، فل يلتحق بالرّكب ويلعب

يا امة ابرز انجازاتها العصبان

آش قلتلكم في البوست السّابق النّاس باش اتهبّط لقشة من السّماء واحنا لاهين في التفاهات بانواعها واشكالها وسفاسف الامور ومنشغلين عن معانيها فمن روتانا و"بوس الواوا" مرورا بالكرة وكورس الزّوايل وصولا الى اكبر كسكسي في العالم واكبر مطبّقة واكبر "بوطحش" على وجه الارض...وحتى العصبان ما سلمش وصلو الطشّ

الاسبوع الفارط انزاد انجاز آخر لانجازات بلاد الفرح الدّائم: اكبر "عصبانة" في العالم تمّ اعدادها في سليمان وقالك طولها 7،05 متر (ركزوا مع 7 اللي ما تغيب على طعام) ووزنها 44 كيلوا!

اسمع الضرب يا بوڨلب اكبر عصبانة في العالم!!ويحبّوا يخلّدوا الانجاز التاريخي في "الڨيناس بوك" اللي يقلّك!

حاصيلو، يا امة ضحكت من جهلها الامم...و ابرز انجازاتها العصبان....

ملاحظة: الخبر المفرح هذا لقيتوا على موقع اذاعة موزاييك

دوربان 2: اسرائيل فوق القانون و البقية تحته

المؤتمر سائر بصفة عاديّة، محمود احمدي نجاد يتكلّم من اعلى المنبر يعبّر (ماو القانون اعطاه الحقّ باش يعبّر) يحكي على وجهة نظر معيّنة تمثّل رأيوا ورأي برشة بلدان في عالمنا الآن: هي انّوا اسرائيل عنصرية، وسياسات امريكا "السابقة" امبريالية وتكلّم على الفيتو في الامم المتحدة اللّي يعطّل في سير هل الهيكل وركّزوا انّوا لا جبد محرقة ولا والوا لكن "رموز الحرّيات" بكل انواعها (امريكا والاتحاد الاوروبي) واطيافها انزعجوا وقامو وحتى اللي تكرّموا وبعثوا "تمثيل ضعيف" او سفراء انسحبوا مل الجلسة وبدأ بعضهم بمحاولة اثارة البلبلة في القاعة تعبيرا على تحضّرهم وولائهم "لربّهم" اسرائيل !!

أ لهذا الحدّ اصبحت حملات العلاقات العامّة مجديّة في تزّيف الامور واللّوبيات الصهيونية ذات تأثير؟! (وركّزوا على العرب راقدين مولا الدّار موش هوني لاهين يتفرّجوا في روتانا والاّ طريّح كورة و الاّ كورس الزّوايل)

بالتمعن في الامر، نلاحظوا انّوا مجرّد هروب اسرائيل من المواجهة والمشاركة في المؤتمر وتجنيدها لكل الوسائل للتشويش... هو اعتراف ضمني بكونها عنصرية وتحرٌكاتها هي عبارة عن رفضها فضح ممارساتها وعوراتها اللتي تحاول اخفائها واللتي اصبح القاصي والدّاني يعرفها.

يقول القائل آش معناها عنصريّة؟

تعريف ويكيبيديا العربية:

بالإنجليزية: Racism

هي الافعال والمعتقدات التي تقلل من شأن شخص ما كونه ينتمي لعرق أو لدين. كما يستخدم المصطلح ليصف الذين يعتقدون ان نوع المعاملة مع سائر البشر يجب ان تحكم بعرق وخلفية الشخص متلقي تلك المعاملة، وان المعاملة الطيبة يجب ان تقتصر على فئة معينة دون سواها.و ان فئة معينة يجب أو لها الحق في أن تتحكم بحياة و مصير الأعراق الأخرى...

المصدر

يعني ابسط حاجة جدار الفصل العنصري الصّهيوني على ارض فلسطين المحتلّة هو عين العنصرية و اسرائيل عنصرية احبّ من احبّ وكره من كره من خلال الاحتلال والاستيطان و المجازر ومختلف الانتهاكات على مدى العقود...

اذن كيف العادة لا تمر تظاهرة والاّ مؤتمر دولي (الكثرة وقلّة البركة) الاّ لتكريس مقولة انّ: "اسرائيل فوق القانون و العرب تحته"
لكن وينهم العرب من هذا الكلّ؟! راقدين في العسل، يتفرّجوا في روتانا, يحلموا ويتبّعوا في الفتفات موش هكّة يا عمرو موسى؟!