يا مزين مالبرّة، آش حالك من داخل

في مقام ثقافة المظاهر واليسار الفيّاس

لحية مسيّبة، "بربيش" كيف المعزة، بعبوص كيف الحصان، كشكول مل الفريب، مريول "تشي ڨيفارا" مالحفصية، والاّ شويّة كاكويّة و حويرة دخّان كريستال وشوية ريحة ميزيريا...

هذي من رموز "النّخب الحرفوشية" آه حبّيت نقول "المثقفة"(والثقافة منهم براء)

امّالا فهمتها كيفاش؟ باش تظهر مثقف و خاصة ملتزم وفاهملها لازمك تحفضلها شوية شعر ثوري والاهمّ مل الكلّ تتلها باللّوك ههههههه (هذا راس المال متاع رؤوس الفكارن)...

والله يحبّس علينا العقلّ والدّين هاذاكا الواحد آش يقول!!

وماهي الحقيقة مرّة والواقع امرّ منها، هاو كلّ شيء بالمكشوف في جريدة
(ويا مزين مالبرّة، آش حالك من داخل)Le temps

ايّا انستوا!!

دار المعمّر "سان لوران" للموضى العالمية

بمناسبة الأجواء الرّائقة والمناخ السعيد المفعم بمظاهر الفرح والانشراح ورياح البهجة التي تمسّ القطرين المغاربيين الشقيقين: تونس شهرت "بلاد الفرح الدّائم في ضلّ القيادة الحكيمة والمتبصرة..." والجماهيرية العربية الليبية الشعبية الاشتراكية العظمى شهرت "الجماهيرية العظمى" (ركّزوا على العظمى)

وذلك تباعا بمناسبة الحدث التّاريخي متاع "تَفَضُّلْ" قائد المسيرة المضفّرة وصانع كلّ شيء في بلاد الزيتون بتقديم ترشّحه للمرّة الخامسة لدور البطولة في مسرحية الانتخابات (بالسيف، بالتلحليح...هو ماعينوش مسكين لزّموا عليه)... واحتفال نظيره "المعمّر" شهر "ملك ملوك افريقيا" بالذكرى الاربعين (آش خلّى على المأسوف على شبابه عمر بنڨوا؟؟!!) لتربّعه على ثروات ليبيا...

تتشرّف دار "المعمّر سان لوران" للموضى العالمية والاناقة بدعوتكم لحضور حفل عرض ازياء تاريخي بمشاركة احد اشهر عارضي الازياء في العالم ...(اضغط على الصور لتكبيرها)

ملاحظة: الرّجاء من السّادة الحاضرين الالتزام بالجدية و عدم الضّحك