الزّيادة في الفارينة

ألعب... وخلّي النّاس تلعب

بعد فكرة ولاّدة ودعوة ديانا ماغازين، هاني باش نلعب ونعبّر على امانيّ وما يخالج وجداني ههههه... ايّا ما نطوّلش عليكم بالكلام وندخل في صلب الموضوع..


خمسة هدايا اتمنى الحصول عليها:


- تنظيم زّواجي (حتّى هوّ وقيت يضهرلي)

- كلاسور فيه الشّهائد العلمية اللي نجري عليهم بالجهد والمعين الله

- ايّ هدية مهما تكون رمزيّة لكنها من القلب

- عِيشَةً هَنِيَّةً ومِيتَةً سَوِيَّةً وغفران ما قدَّمَتْه وما اخّرته يميني

- مكتبة ما تفرغش من الكتب اللّي ديما يتجدّدوا وتكون في ورشة صغيرة في سيدي بوسعيد

(كنت باش نقول تحرير فلسطين اما هذي حاجة ما تتهداش اما تتكسب بالجهدددددددددد...)


خمسة إجراءات أتخذها لو كنت رئيس دولة: (ولو انّي مانحبّش مسؤوليّات كيف ما هكّة)


- العمل بكلّ صدق واخلاص على جعل النّظام ديمقراطي (باتمّ معنى الكلمة) والتّداول السّلمي على السّلطة في ضلّ تكافئ الفرص والشفافية المطلقة والتّنقيص من سلط رئيس الجمهورية مع الفصل التام بين السلط الثلاث وفصل الدولة واجهزتها عن الحزب الحاكم...

- اجراع اصلاح شامل على النظام التّعليمي في البلاد على خاطر كيف ما تعرفوا هذا هو اساس التّقدم (وتعرفوا زادة المستوى المؤسف الذّي وصلّو هل القطاع)

- العمل على تحرير الاعلام و القضاء على الغة الخشبيية والصنصرة... (لكن بالطبيعة في حدود تنتهي حريتك عندما تبدأ حرية غيرك)

- اوديت شامل لكلّ المسؤوليين الكبار في البلاد اللّي مشكوك في ثرائهم السّريع والمفاجئ بعد تولّيهم مهامهم وزادة عائلاتهم (اصهار الرّؤساء زادة...)، نشر التقارير, تجريدهم من كلّ ماهو غير شرعي وترك للشعب حرية الاختيار بين العفو عنهم او محاكمتهم.

- الاهتمام بالشّباب وخاصة من الطبقات المتوسطة والضّعيفة والقضاع على المحسوبية والمعارف في كل شيء ونتلها بالحقّ (موش بالكلام كيف توة) بالاحياء والحوم المزمرة


خمسة أشخاص اتمنى أن أضربهم: (الله غالب برشة ماذبيّا نعطيهم داوْدي, بونيا والا شلبوق (درجات هههههه) مع انّي ضد العنف ونؤمن انّوا ما يحلّش المشاكل بل يزيد يعمّقها)


- بيريز، اولمرت، ليفني، بن اليعازر، دان حالوتز، باراك (موش اوباما اما الدبّ الصهيوني), كلّ واحد صهيوني , الملك متاع السعودية، بوش، حسني مبارك، وليد جنبلاط, سمير جعجع, محمود عباس والقائمة تشمل كلّ اللي من هالنوع

- اللّي يظلم غيروا (ماللي يضرب مرتوا للّي يغتصب مرورا بلّي يلوّث في المجال السّمعي بكلامو المنمق البذيء)

- الطّرابلسية

- برشة صحفيين توانسة يستحقّوا شلابق

- ساركوزي كيف يبدا يفيّش


خمسة أشخاص اتمنى العيش معهم:


- المسيح ورسول الله سيدنا محمّد عليه الصلاة والسلام

- عائلتي والنّاس اللّي نحبّهم

- السيد حسن نصرالله

- اصحابي الكلّ

- مهاتما غاندي

خمسة أشياء أفعلها لو علمت أني سأموت غدا:


- نسلّم على العباد اللي نعرفهم الكلّ

- نطلب السّماح من كلّ حد نشكّ والا نظنّ اني غلطت في حقّوا

- نمشي لسوسة والمكنين وبعد نعمل دورة في سيدي بوسعيد (في تراكن العادة) مع صحابي اللي يعرفوا ارواحهم

- نعمل سهرية عائلية مع الناس اللي نحبّهم

- التعبد وقراءة القرآن, نمشي نصلٌّي الصبح في الجامع وياربّي انشاء الله نموت وانا ساجد لربّ العالمين



ايّا توّه انّستوا هاني قلت كلّ شيء, آه اما قبل ما نمشي باش نختار 5 ناس انشاء الله يقبلو ويشاركوا في اللّعبة: خميّس باندي شهر ولد الفكرونة، مهدي اللجمي، سفيان والاّ لينا (والاّ الاثنين )، طارق الكحلاوي، نضال ضد الطابور الخامس و كل المتآمرين على مستقبلنا... وزادة كلّ حدّ يحب يشارك، فل يلتحق بالرّكب ويلعب

يا امة ابرز انجازاتها العصبان

آش قلتلكم في البوست السّابق النّاس باش اتهبّط لقشة من السّماء واحنا لاهين في التفاهات بانواعها واشكالها وسفاسف الامور ومنشغلين عن معانيها فمن روتانا و"بوس الواوا" مرورا بالكرة وكورس الزّوايل وصولا الى اكبر كسكسي في العالم واكبر مطبّقة واكبر "بوطحش" على وجه الارض...وحتى العصبان ما سلمش وصلو الطشّ

الاسبوع الفارط انزاد انجاز آخر لانجازات بلاد الفرح الدّائم: اكبر "عصبانة" في العالم تمّ اعدادها في سليمان وقالك طولها 7،05 متر (ركزوا مع 7 اللي ما تغيب على طعام) ووزنها 44 كيلوا!

اسمع الضرب يا بوڨلب اكبر عصبانة في العالم!!ويحبّوا يخلّدوا الانجاز التاريخي في "الڨيناس بوك" اللي يقلّك!

حاصيلو، يا امة ضحكت من جهلها الامم...و ابرز انجازاتها العصبان....

ملاحظة: الخبر المفرح هذا لقيتوا على موقع اذاعة موزاييك

دوربان 2: اسرائيل فوق القانون و البقية تحته

المؤتمر سائر بصفة عاديّة، محمود احمدي نجاد يتكلّم من اعلى المنبر يعبّر (ماو القانون اعطاه الحقّ باش يعبّر) يحكي على وجهة نظر معيّنة تمثّل رأيوا ورأي برشة بلدان في عالمنا الآن: هي انّوا اسرائيل عنصرية، وسياسات امريكا "السابقة" امبريالية وتكلّم على الفيتو في الامم المتحدة اللّي يعطّل في سير هل الهيكل وركّزوا انّوا لا جبد محرقة ولا والوا لكن "رموز الحرّيات" بكل انواعها (امريكا والاتحاد الاوروبي) واطيافها انزعجوا وقامو وحتى اللي تكرّموا وبعثوا "تمثيل ضعيف" او سفراء انسحبوا مل الجلسة وبدأ بعضهم بمحاولة اثارة البلبلة في القاعة تعبيرا على تحضّرهم وولائهم "لربّهم" اسرائيل !!

أ لهذا الحدّ اصبحت حملات العلاقات العامّة مجديّة في تزّيف الامور واللّوبيات الصهيونية ذات تأثير؟! (وركّزوا على العرب راقدين مولا الدّار موش هوني لاهين يتفرّجوا في روتانا والاّ طريّح كورة و الاّ كورس الزّوايل)

بالتمعن في الامر، نلاحظوا انّوا مجرّد هروب اسرائيل من المواجهة والمشاركة في المؤتمر وتجنيدها لكل الوسائل للتشويش... هو اعتراف ضمني بكونها عنصرية وتحرٌكاتها هي عبارة عن رفضها فضح ممارساتها وعوراتها اللتي تحاول اخفائها واللتي اصبح القاصي والدّاني يعرفها.

يقول القائل آش معناها عنصريّة؟

تعريف ويكيبيديا العربية:

بالإنجليزية: Racism

هي الافعال والمعتقدات التي تقلل من شأن شخص ما كونه ينتمي لعرق أو لدين. كما يستخدم المصطلح ليصف الذين يعتقدون ان نوع المعاملة مع سائر البشر يجب ان تحكم بعرق وخلفية الشخص متلقي تلك المعاملة، وان المعاملة الطيبة يجب ان تقتصر على فئة معينة دون سواها.و ان فئة معينة يجب أو لها الحق في أن تتحكم بحياة و مصير الأعراق الأخرى...

المصدر

يعني ابسط حاجة جدار الفصل العنصري الصّهيوني على ارض فلسطين المحتلّة هو عين العنصرية و اسرائيل عنصرية احبّ من احبّ وكره من كره من خلال الاحتلال والاستيطان و المجازر ومختلف الانتهاكات على مدى العقود...

اذن كيف العادة لا تمر تظاهرة والاّ مؤتمر دولي (الكثرة وقلّة البركة) الاّ لتكريس مقولة انّ: "اسرائيل فوق القانون و العرب تحته"
لكن وينهم العرب من هذا الكلّ؟! راقدين في العسل، يتفرّجوا في روتانا, يحلموا ويتبّعوا في الفتفات موش هكّة يا عمرو موسى؟!

انصر " صديقك" ظالما او مظلوما

"US boycotts racism conference

The United States has said it will not attend an United Nations conference on racism because the text of the draft final statement contains language it is "unable to support", the state department has said.

Negotiators had been trying to find common ground before the meeting in Geneva, but the US said there were still concerns it would limit free speech and single out Israel for criticism..."

Source: http://tiny.cc/BZ5jW
(ici) et (ici)

هاو الديمقراطية و الحرية و النّزاهة والحياد.. على قواعدهم يا بوڨلب..!!!

امّالا وينك انت اهمّ حاجة ولاّت هي مشاعر اسرائيل (منين تعرف يمشيوش القُطْعِية يتّهموها والاّ يقولو فيها كلام وتتجرح هل المشاعر الرّقيقة النبيلة متاع سفّاحي الاطفال الفلسطينيين وهاني باش نتجاوز "تقييد حرية التعبير" اللّي يقصدو بيها تحفظهم على دعوة هل المؤتمر لاحترام المعتقدات الدينية وتجنّب الاعتداء عليها ـ وهنا كيف العادة، الاسلام هوّ اللي في الحنديرة...)

ماو تعرفوا ما يجيشي منّوا يخليّوها بدولة مُغْتَصِبَة "صديقة" لامريكا وزيد على هذا بلاد مسالمة دايرين بيها الاعداء وهي ما عندها كان "جيش دفاع" (اما ديما يهاجم حتّى في العزّل!!) مْسِيكنة عمرها ما سمعت بحاجة اسمها عنصرية و "ابارتايد" ملايكة لا تخبّش لا اتدبّش غير شوية مذابح واستيطان واغتصاب ارض وتهجير شعب و شوية اسلحة محرمة دوليا وتشويه وتزييف للتراث الانساني في القدس وضرب عرض الحائط بكلّ القيم الانسانية والقرارات الاممية على مدى 60 سنة و...و... تي بربّي آش فيهم هذوما؟! (لكن فمّا ايضا قاسم مشترك آخر بيناتهم ـ ومعاهم استراليا وكندا اللّي موش عاجبهم هل مؤتمرـ هو سوابقهم مع السكان الاصليين لبلدانهم ولذلك ينجّموا يكونو يراو في ارواحهم في اللّي يعملو فيه اصدقائهم الصهاينة في حقّ الفلسطينيين...)

اما قولولي زعمة هاذا وجه آخر من اوجه "امريكا التّغيير"؟! متاع اوباما بالطّبيعة يمشيش يجي في بالكم "تغيير" آخر (اما الستّار ربّي يطلعشي اوباما متأثّر بالمودال والمثال النّاجح متاع جماعة الفرح الدّائم ماكم تعرفوا كلّ شيء ولاّ وارد اليوم؟؟!!) وحتّى الانترناشنال هيرالد تريبيون (في ملحق الاشهار هههه) ولاّت تشكر واتمجّد في "الرّؤية الاستشرافية وبعد النّظر والتّبصّر..." الحاصل احنا عندنا التجوع وهوما عندهم "الآيباك" وديما نورمال

بدون تعليق

سجناء الرّأي في تونس من وجهة نظر خاصّة جدّا

Le dictateur!!!

ا 9 أفريل 1938 /9 أفريل 2009

دقيقة صمت ترحّما على شهداء هذا الوطن الابرار في عيدهم وفاتحة لأرواحهم الزّكية

ملاحظة: يصادف هذا اليوم كذلك ذكرى مؤلمة اخرى هي سقوط بغداد تحت الاحتلال الامبريالي الامريكي

Un air de chez nous, non?! (video)

بلد الفرح الدّائم والامور ديما كيف الزّيت فوق الماء والشمس مشرقة والعصافير تزقزق... والصّحافة حرة مستقلّة...!!! والفريق الوطني في العلالي والرّياضة التونسية متألّقة عالميا بفضل الرّعاية الموصولة... والشّباب هو الحلّ و من دعائم جمهورية الغدّ...!!

الحاصل جنّة وفيها...الحياة الكريمة والسّعيدة والشفافية والمصداقية واللغة الخشبية والاحزاب الصورية والخرق البنفسجيّة و...و...و...و...و...و... ( زعمة موش برشة علينا هذا الكلّ؟!)

ملاحظة: في هذا اليوم نتمنّا الرّحمة "للزّعيم الرّاحل" اللّي عمل الباهي كيما عمل الخايب اما يقعد خير من غيروا

قلة أدب

قرأتُ في القُرآنْ :


" تَبَّتْ يدا أبي لَهَبْ "


فأعلنتْ وسائلُ الإذعانْ :


" إنَّ السكوتَ من ذَهَبْ "


أحببتُ فَقْري .. لم أَزَلْ أتلو :


" وَتَبْ


ما أغنى عَنْهُ مالُهُ و ما كَسَبْ "


فصُودِرَتْ حَنْجَرتي


بِجُرْمِ قِلَّةِ الأدبْ


وصُودِرَ القُرآنْ


لأنّه .. حَرَّضَني على الشَّغَبْ!

أحمد مطر

وجهان لعملة واحدة

نقاط الاختلاف هي نقاط الالتقاء بينهما