عمّار والفايس بوك أوآخرما صدرفي طرق الحجب

الفايس بوك اللّي واضح انّوا قلّق ومازال يقلّق في اللّي باركين على البلاد من اسياد عمّار 404، في الاول سكروه كيما غيرو من المواقع اللّي تمّ حجبها ياخي كيف قامت القيامة والنّاس الكلّ تكلّمت عاودوا حلّوه ومكره اخاك لابطل قال شنوّة غلطة وتمّ تصليحها خاصة وانّو ولاّت فما قضيّة عدليّة وتنجّم تولّي فمّا شوشرة في الحكاية ...

و بما انّو عمّار والجماعة اللّي حطّوه نيّتهم ماهيش صافية ركّحوا الجوّ مدّة واستغلّوا الوقت هذاكا باش يلقاو كيفاش يصنصروا الفايس بوك تحت حسّ مس ّوهاذاكا اللّي صار خاطر الأيامات هاذي فمّا مجموعات ماعادش تتحلّ في تونس وهي اللّي تحكي على مواضيع حسّاسة وتقلق كيما الحوض المنجمي والاّ التعذيب وغيرهم في حين انّوا الباقي الكل يتحلّو بطريقة عادية وهكّا كأنّهم قاعدين يقتلوا بال
"pistolet silencieux"
ولا من رأى ولا من سمع وبعّد تلقى شلّة الاوباش وجماعة التجوّع الدّيماغوجي يحكيو على الانفتاح والحريات في البلاد وخاصّة على حريّة التعبير

على هذاك احنا المدونين مالازمناش نسكتوا على اللّي قاعد يصير وعلى اللعبة القذرة هاذي ويظهرلي اكثر الاخوة انخرطوا وشاركو نهار4 نوفمبر بتدوينات ضدّ الحجب وموافقين على المبدأ هذا وصدقوني راهو الدّوام ينقب الرّخام كيما يقولو ناس بكري!

نحبّ نزيد حاجة للمسؤولين على الحجب ولعمّار 404 انّوا اللّي يعملو فيه ماهو الاّ اهدار للمجهود والمال العام واكثر النّاس تعرف الحقيقة ومهما طال الدهر ديما لازم خنّارهم وفضايحهم يخرجو خاصّة انّهم يعرفوا انّو صابونهم ديما منشور في وسائل الاعلام الاجنبيّة اللي ديما فاضحتهم رغم كلّ ما خرّجوا فيها من مقالات مدفوعة الاجر متاع بروبقاندا رخيصة

وهاو شوفوا بعينيكم تقرير لسفير فرنسا حول الانترنات في بلادنا كان بعثوا لوزارة الخارجيّة متاع بلادو في آخر الصّيف اللّي تعدّى...

(اضغط على الصّورة لتكبيرها)

Source: http://www.bakchich.info/article5733.html

ملاحظة: موش غريب كان غدوة عمّار يتعدّى بالخردة ال404 متاعوا على المدونة متاعي والحاجة هاذي كان وقعت راهي تبرهن على صحّة كلامي