ثمة بلاد خايبة برشه… ومّسخة …وطافية …وموحشة
جات مطرفة…في الخلا والقفار
أمّاليها خايبين…سنيهم صفر…وعينيهم محوقين
لحمهم بالـﭭراد
لحييهم موش محجمة…كلامهم مرزي
خزرتهم حرشة
النهار الكل وهوما يتـﭭوحروا
نساهم سمان ومفقحين
يخافوا من الرعد ومن طوير الليل
يرقدوا بكري
وآش يموتوا ع السلف
كل شيء يعملوه بالسرقة
يفطروا بالسرقة
يبنيوا بالسرقة
يتقابلوا بالسرقة
يجامعوا بالسرقة
الا السرقة…
هاذيكة…ماو الحق…
يعملوها بالجهار
علاش موش نهار..وهوما في خطاية نومهم، بعدم تفرجوا على مسلسل ينعس الكلب على…خريتو،
واذا بيها يقوم عليهم زلزال يفنيهم على بكرة أبيهم
ما منع منهم كان واحد
جاء في لول باش يخبّر …ومن بعد رجعلو شاهد العقل
خاف
ليوحلوها في راسوا
كلام الليل
توفيق الجبالي
Aucun commentaire:
Enregistrer un commentaire